राजधानी दिल्लीत नुकत्याच झालेल्या ‘कॉकरोच जनता पार्टी’ (CJP) च्या आंदोलनाचे लोण आता थेट आर्थिक राजधानी असलेल्या मुंबईपर्यंत पोहोचले आहे. मुख्य निवडणूक आयुक्त ज्ञानेश कुमार यांच्या कथित मतचोरी आणि कारभाराविरोधात CJP च्या वतीने मुंबईतील ऐतिहासिक दादर येथील शिवाजी पार्कवर एका तीव्र आंदोलनाची पूर्वघोषणा करण्यात आली होती. आंदोलनाची वेळ दुपारच्या सुमारास ठरलेली असली, तरी आदल्या रात्रीपासूनच परिसरात कार्यकर्ते आणि नागरिक मोठ्या संख्येने जमा होऊ लागले होते. गर्दी वाढू लागल्याने खबरदारीचा उपाय म्हणून मुंबई पोलिसांनी आक्रमक पवित्रा घेत आंदोलनकर्त्यांची सक्तीने धरपकड सुरू केली. या धडक कारवाईदरम्यान प्रसिद्ध सामाजिक कार्यकर्त्या अंजली दमानिया यांनाही पोलिसांनी ताब्यात घेतले, ज्यामुळे संपूर्ण शिवाजी पार्क परिसरात एकच खळबळ उडाली व मोठा गोंधळ निर्माण झाला. संतप्त आंदोलकांनी पोलीस व्हॅनभोवती जमून सरकारच्या विरोधात जोरदार घोषणाबाजी केली.
शिवाजी पार्कात छावणीचे स्वरूप
परिस्थितीचे गांभीर्य लक्षात घेत पोलिसांनी शिवाजी पार्ककडे जाणारे सर्व प्रमुख मार्ग बॅरिकेड्स लावून पूर्णपणे बंद केले आहेत. संपूर्ण परिसरात अज्ञातांचा प्रवेश रोखण्यासाठी कडेकोट पोलीस बंदोबस्त तैनात करण्यात आला असून येणाऱ्या-जाणाऱ्या प्रत्येक नागरिकाची कसून चौकशी केली जात आहे. परिसरातील स्थानिक रहिवाशांची वाहने व कागदपत्रे तपासल्यानंतरच त्यांना आत सोडण्यात येत आहे. यादरम्यान, शिवाजी पार्कच्या दिशेने जात असताना महाराष्ट्र नवनिर्माण सेनेचे युवा नेते अमित ठाकरे यांनाही पोलिसांनी वाटेत अडवले.
या प्रकारावर तीव्र संताप व्यक्त करत अमित ठाकरेंनी पोलिसांच्या भूमिकेवर कडक शब्दांत ताशेरे ओढले. “मुंबई पोलीस हे दिल्लीचे पोलीस नाहीत, त्यांच्यात मोठा फरक आहे. मी माझ्या आयुष्यात शिवाजी पार्कात असा प्रकार कधीही पाहिला नाही, मला चालत असतानाही अडवण्यात आले,” असे म्हणत त्यांनी पोलिसांच्या कारवाईचा निषेध केला. “पोलिसांनी कोणत्याही राजकीय दबावाखाली येऊन काम करू नये. नवरात्रीच्या पहिल्याच दिवशी महिलांवर हात उचलला जातोय, हा नेमका काय प्रकार सुरू आहे?” असा संतप्त सवाल त्यांनी उपस्थित केला.
मुंबईपाठोपाठ पुण्यातही CJP च्या आंदोलनाची धास्ती
मुंबईत सुरू असलेल्या या दडपशाहीचे पडसाद राज्यभरात उमटत असून, याच धर्तीवर पुणे शहरातही CJP च्या कार्यकर्त्यांवर कारवाईचा बडगा उगारण्यात आला आहे. मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी पुण्याच्या प्रसिद्ध गुडलक चौकातील ‘कलाकार कट्टा’ येथे आंदोलनाचा इशारा देण्यात आला होता.
हेही वाचा – ‘काल सोडलं असतं तर आजीचं अंतिम दर्शन घेता आलं असतं’ – अभिजित दीपकेच्या आई-वडिलांचा दिल्ली पोलिसांवर संताप
मात्र, कायदा व सुव्यवस्था अबाधित ठेवण्याच्या नावाखाली पुणे पोलिसांनी सकाळपासूनच गुडलक चौक आणि लगतच्या परिसरात प्रचंड पोलीस फौजफाटा तैनात केला आहे. काल १० ऑक्टोबर रोजी दिल्लीत जंतरमंतर मैदानावर झालेल्या CJP च्या आंदोलनाला देशव्यापी पाठिंबा मिळाल्यामुळे आणि केंद्र सरकारने तिथे कडक पावले उचलल्यामुळे, आता महाराष्ट्र पोलीसही सावध भूमिका घेत आंदोलकांना रोखण्याचा आटोकाट प्रयत्न करत आहेत.
