‘देश जाळणारी तरुण पिढी आपल्या देशात नको…’; भगवान गडावरून पंकजा मुंडे यांचे तरुण पिढीबाबत मोठं वक्तव्य

बीड जिल्ह्यातील ऐतिहासिक आणि पवित्र अशा भगवान गडावरून भाजप नेत्या तथा मंत्री पंकजा मुंडे यांनी दसरा मेळाव्याच्या निमित्ताने उपस्थित जनसमुदायाला अत्यंत जोशपूर्ण आणि भावनिक भाषणात संबोधित केले. यावेळी त्यांनी आपले दिवंगत वडील गोपीनाथ मुंडे यांच्या आठवणींना उजाळा देत कार्यकर्त्यांच्या अफाट प्रेमाबद्दल कृतज्ञता व्यक्त केली. दुष्काळाच्या तीव्र परिस्थितीवर भाष्य करताना त्यांनी, “माझे कार्यकर्ते म्हणजे उन्हात आणि डोंगरात काम करणारे वाघ आहेत, त्यांना कसलीही भीती वाटत नाही,” असे स्पष्ट करत कार्यकर्त्यांच्या पाठीशी खंबीरपणे उभे राहण्याचा निर्धार व्यक्त केला. या मेळाव्यात पंकजा मुंडे यांच्या आक्रमक भूमिकेमुळे उपस्थितांमध्ये मोठा उत्साह पाहायला मिळाला.

‘हे माझे मधाचे पोळे आहे, माझ्या लेकरांनी खूप कष्ट केले’

भाषणादरम्यान पंकजा मुंडे यांनी आपल्या राजकीय प्रवासातील संघर्षावर प्रकाश टाकला. दुष्काळ असताना मेळावा कसा होणार, अशी शंका उपस्थित करणाऱ्यांना चोख प्रत्युत्तर देताना त्यांनी, “लगी चुकी हैं तलब जीत की…” या शेरोशायरीच्या माध्यमातून आपला लढाऊ बाणा पुन्हा एकदा सिद्ध केला. भगवान भक्तीगडाच्या निर्मितीचा प्रवास सांगताना त्यांनी गोपीनाथ मुंडे यांच्या लेकीच्या खंबीरपणाची जाणीव करून दिली. आपल्या कार्यकर्त्यांची तुलना मधमाशांशी करताना त्यांनी, “एखाद्या कुत्र्याला दगड मारला तर तो ओरडेल, पण मधाच्या पोळ्याला हात लावला तर काय होते हे साऱ्यांना माहीत आहे, हे माझे मधाचे पोळे आहे आणि माझ्या लोकांनी कष्टाने ते तयार केले आहे,” असे सांगत विरोधकांना कडक शब्दांत इशारा दिला.

हेही वाचा – गोकुळ दूध संघ निवडणुकीत हसन मुश्रीफ यांच्या मुलाचा पराभव; मुश्रीफांनी सांगितलं पराभवामागचं खरं कारण

पंकजा मुंडे यांचे देशप्रेमावर मोठे वक्तव्य

या मेळाव्यात बोलताना पंकजा मुंडे यांनी आजच्या तरुण पिढीच्या मानसिकतेवर आणि जागतिक घडामोडींवर महत्त्वपूर्ण भाष्य केले. फ्रान्स, पॅरिसमधील जाळपोळ, रशिया आणि इराणमधील युद्धाच्या पार्श्वभूमीवर बोलताना त्यांनी देशातील तरुणाईमध्ये देशभक्तीची भावना किती महत्त्वाची आहे, हे अधोरेखित केले. “आपल्या देशाला अशी तरुण पिढी नको, जिच्या मनात देशाबद्दल आदर नाही किंवा ज्यांच्या रक्तात देशभक्तीचे टॉनिक भरण्याची गरज भासते,” असे मत त्यांनी व्यक्त केले. स्वतःचे घर आणि देश जाळून आंदोलने करणाऱ्या संस्कृतीवर टीका करत त्यांनी जयप्रकाश नारायण यांच्या चळवळीतून प्रेरणा घेऊन गोपीनाथ मुंडे यांच्यासारखे राष्ट्रप्रेमी सैनिक घडण्याची आणि देशाचे नेतृत्व पुढे नेण्याची आज नितांत गरज असल्याचे सांगितले.