भारतीय कुस्तीपटू सुजित कलकलने आशियाई क्रीडा स्पर्धेत आपल्या अफाट कौशल्याच्या आणि धैर्याच्या जोरावर कुस्तीच्या आखाड्यात सुवर्णपदकाला गवसणी घातली आहे. पुरुषांच्या 65 किलो फ्रीस्टाईल गटाच्या अत्यंत रोमांचक ठरलेल्या अंतिम फेरीत त्याने ताजिकिस्तानच्या अब्दुलमजीद कुदिएव्हचा 10-9 अशा निसटत्या फरकाने पराभव केला. एका टप्प्यावर सुजित 2-9 असा तब्बल 7 गुणांनी मागे होता आणि त्याचा पराभव जवळजवळ निश्चित मानला जात होता. मात्र, जिद्द न सोडता शेवटच्या अवघ्या 90 सेकंदात त्याने असा काही खेळ दाखवला की, संपूर्ण सामन्याचे चित्रच बदलून गेले आणि त्याने अशक्य वाटणारा विजय शक्य करून दाखवला.
शेवटच्या दीड मिनिटातील सुजितची धडाकेबाज मुसंडी
सामन्याच्या पहिल्या फेरीत सुजित 2-4 असा पिछाडीवर होता. दुसऱ्या फेरीत ताजिक कुस्तीपटूने अधिक आक्रमक पवित्रा घेत आपली आघाडी 9-2 पर्यंत वाढवली. इतक्या मोठ्या फरकाने मागे असूनही सुजितने संयम गमावला नाही. सामन्याचे अंतिम दीड मिनिट शिल्लक असताना सुजितने जोरदार आक्रमण करण्यास सुरुवात केली. त्याने प्रतिस्पर्ध्याला सलग चार वेळा खाली पाडून (टेकडाऊन करून) एकापाठोपाठ एक 8 गुण वसूल केले. त्यामुळे सामन्याची धावसंख्या 8-9 अशी झाली. सामना संपण्यास अवघे काही सेकंद उरलेले असताना ताजिक खेळाडूकडे अजूनही 1 गुणाची आघाडी होती.
अखेरच्या 10 सेकंदात निर्णायक चाल आणि सुवर्णयशावर मोहर
सामना संपायला अवघे 10 सेकंद शिल्लक असताना सुजितने अत्यंत वेगाने आणि अचूकतेने एक प्रभावी चाल रचली. त्याने ताजिक कुस्तीपटूला पुन्हा एकदा जमिनीवर टेकवत 2 निर्णायक गुण पटकावले आणि धावसंख्या 10-9 अशी फिरवली. कठीण प्रसंगातही खचून न जाता योग्य क्षणी दाखवलेल्या या प्रसंगावधानामुळे सुजितने हरत आलेला सामना जिंकून भारतासाठी सुवर्णपदक निश्चित केले.
हेही वाचा – क्रिकेटमध्ये फुटबॉलसारखा नवा नियम; 2027 च्या वनडे विश्वचषकातील सुपर-7 फेरीसाठी ‘असा’ निवडला जाणार सातवा संघ
हरियाणाच्या सुजितची कुस्तीतील कौतुकास्पद वाटचाल
हरियाणातील चरखी दादरी येथील रहिवासी असलेल्या 23 वर्षीय सुजित कलकलचा जन्म 5 नोव्हेंबर 2002 रोजी झाला. त्याला कुस्तीचे धडे आणि प्रेरणा आपले वडील दयानंद कलकल यांच्याकडून मिळाले, जे स्वतः राष्ट्रीय स्तरावरील कुस्तीपटू राहिलेले आहेत. सुजितने यापूर्वी ‘अंडर-20’ आणि ‘अंडर-23’ आशियाई चॅम्पियनशिपमध्ये सुवर्णपदके जिंकली आहेत, तसेच सर्बियातील नोव्ही साद येथे झालेल्या ‘अंडर-23’ जागतिक अजिंक्यपद स्पर्धेतही सुवर्णपदक पटकावले आहे. 65 किलो वजनी गटातील त्याच्या या ऐतिहासिक विजयामुळे भारतीय कुस्ती क्षेत्राचे नाव जगभरात पुन्हा एकदा उंचावले असून देशभरातून त्याच्यावर कौतुकाचा वर्षाव होत आहे.
