मुंबईतील : गोरेगाव परिसरात एका २० वर्षीय तरुणीवर झालेल्या अमानुष अत्याचारामुळे संपूर्ण शहर हादरले आहे. राम मंदिर स्टेशनजवळ ती बेशुद्ध अवस्थेत सापडली. तिच्या गुप्तांगात सर्जिकल ब्लेड आणि दगड सापडल्याने घटना अधिक गंभीर ठरली आहे.
पीडित महिलेने सांगितले की ती वाराणसीत एका काकांच्या देखरेखीखाली वाढली. २० जानेवारी रोजी ती काकासोबत विमानाने मुंबईला आली होती. मात्र, पोलिसांच्या तपासात उघड झाले की तिचे आई-वडील नालासोपारा येथे राहतात. तिच्या वडिलांचा रागीट स्वभाव आणि सततच्या भांडणांमुळे ती २१ जानेवारी रोजी घर सोडून पळाली होती.
रिक्षाचालकाशी भेट आणि दुर्दैवी घटना
घर सोडल्यानंतर ती नालासोपारा स्टेशनवर पोहोचली. तेथे तिची ओळख एका रिक्षाचालकाशी झाली. कौटुंबिक तणाव आणि आत्महत्येच्या विचारांबाबत महिलेने त्याच्याशी संवाद साधला. रिक्षाचालकाने तिचे सांत्वन करण्याचा बहाणा करत तिला अर्नाळा येथे नेले. त्यानंतर त्याने तिच्यावर दोनदा बलात्कार केल्याचा आरोप महिलेने केला आहे.
त्यानंतर, रिक्षाचालकाने तिला नालासोपारा स्टेशनजवळ सोडले. त्यानंतर ती राम मंदिर स्टेशनजवळ बेशुद्ध अवस्थेत आढळली. तिला तत्काळ केईएम रुग्णालयात दाखल करण्यात आले.
पोलिसांचा तपास आणि महिला सुरक्षेवर प्रश्नचिन्ह
घटनेनंतर पोलिसांनी तातडीने कारवाई करत रिक्षाचालकाला अटक केली आहे. महिलेची वैद्यकीय तपासणी करण्यात आली असून तिच्यावर उपचार सुरू आहेत. मात्र, या घटनेमुळे मुंबईतील महिलांच्या सुरक्षेबाबत पुन्हा प्रश्नचिन्ह निर्माण झाले आहे.
पोलीस तपासात असेही उघड झाले की पीडित महिलेने याआधी देखील घरातून पळ काढण्याचे प्रकार केले होते. तिच्या मानसिक स्थितीचा विचार करता, पोलिसांना या घटनेतील काही गोष्टींबाबत शंका आहे. तथापि, महिलेने दिलेल्या माहितीनुसार, आरोपीवर गुन्हा दाखल करण्यात आला आहे.
👉👉 हे देखील वाचा : "उद्धव ठाकरे स्वबळाबाबत बोलले, पण..."
मुंबईसारख्या मोठ्या शहरात अशा घटना वारंवार समोर येणं चिंतेचा विषय आहे. महिलांच्या सुरक्षेसाठी कठोर उपाययोजना करण्याची आवश्यकता अधोरेखित झाली आहे. सार्वजनिक ठिकाणी सीसीटीव्हीची कार्यक्षम व्यवस्था, रिक्षाचालकांची पडताळणी आणि महिलांना सुरक्षा उपायांची जाणीव करुन देणं अत्यावश्यक आहे.
घटनेने पुन्हा एकदा महिलांच्या सुरक्षिततेच्या प्रश्नांवर लक्ष केंद्रित केले आहे. सरकार, प्रशासन, आणि नागरिकांनी एकत्र येऊन अशा घटनांना थांबवण्यासाठी ठोस पावले उचलणे आवश्यक आहे.
रिक्षाचालक राजरतन वायवळ, वय 32, याला वाळीव येथील खैरपाड्याच्या झोपडपट्टीतून पोलिसांनी ताब्यात घेतले असून, त्याने 20 वर्षीय तरुणीवर बलात्कार केल्याची कबुली दिली आहे. पीडित महिलेसंदर्भात यापूर्वी निर्मल नगर पोलीस ठाण्यात आणि आझाद मैदान पोलीस ठाण्यात गुन्हा दाखल करण्यात आला होता. आरोपी राजरतन वायवळ हा दोन मुलींचा पिता असून, या प्रकरणात अतिरिक्त पोलीस आयुक्त अभिषेक त्रिमूखे यांच्या नेतृत्वाखाली वनराई पोलीस ठाण्यात तपास सुरू आहे.
👉👉 जय महाराष्ट्र न्यूजच्या थेट संपर्कात राहण्यासाठी व्हॉट्सअप चॅनेल वर क्लिक करा.