देवदर्शनासाठी निघालेल्या भाविकांवर काळाचा घाला! ट्रॅव्हलर बस 15 फूट खोल खड्ड्यात कोसळली; 8 जणांचा मृत्यू
राजस्थानमधील कोटा जिल्ह्यातून एक अत्यंत मन हेलावून टाकणारी आणि मोठी दुर्घटना समोर आली आहे. दिल्ली-मुंबई एक्सप्रेसवेवर शनिवारी पहाटेच्या सुमारास झालेल्या एका भीषण रस्ते अपघातात 8 भाविकांचा जागीच मृत्यू झाला, तर 17 जण गंभीर जखमी झाले. मध्य प्रदेशातील 25 हून अधिक भाविकांना घेऊन जाणारी एक मिनी-बस (टेम्पो ट्रॅव्हलर) खाटू श्यामजीच्या दर्शनासाठी जात असताना कोटा जवळील कराडिया भागात अनियंत्रित होऊन थेट 15 फूट खोल खड्ड्यात कोसळली. या दुर्घटनेमुळे प्रवाशांच्या कुटुंबावर मोठा आघात झाला आहे.
चालकाचे नियंत्रण सुटल्याने बस खड्ड्यात
मिळालेल्या सविस्तर माहितीनुसार, हे सर्व भाविक मध्य प्रदेशातील बैतुल जिल्ह्यातील मुलताई पोलीस ठाण्याच्या हद्दीतील घाट बिरोली आणि परिसरातील रहिवासी होते. भोपाळहून निघालेली ही टेम्पो ट्रॅव्हलर कोटा जिल्ह्यातील कराडिया टोल प्लाझाजवळ आली असता, पहाटे 6:00 च्या सुमारास एक्सप्रेसवेवरील पोल क्रमांक 384 जवळ चालकाचे अचानक वाहनावरील नियंत्रण सुटले. परिणामी, गाडी पुलाच्या बाजूने थेट सुमारे 15 फूट खोल खड्ड्यात जाऊन कोसळली. पहाटेचा अंधार, तसेच खड्ड्यात साचलेला गाळ आणि पाणी यामुळे सुरुवातीच्या बचावकार्यात काही काळ अडथळे निर्माण झाले होते.
जखमींवर आयसीयूमध्ये उपचार
घटनेची माहिती मिळताच सिमलिया पोलीस ठाण्याचे प्रभारी (SHO) नंद सिंग आणि आपत्कालीन पथक तातडीने घटनास्थळी दाखल झाले. प्रशासनाने वेळेचे महत्त्व ओळखत तातडीने 3 रुग्णवाहिका तैनात केल्या आणि क्रेनच्या साहाय्याने अपघातग्रस्त बस खड्ड्यातून बाहेर काढली. जिल्हाधिकारी पियुष सामरिया यांनी दिलेल्या माहितीनुसार, या अपघातात 8 जणांचा मृत्यू झाला असून सर्व 17 गंभीर जखमींना तातडीने न्यू मेडिकल कॉलेज हॉस्पिटल आणि एमबीएस हॉस्पिटलमधील अतिदक्षता विभागात (ICU) दाखल करण्यात आले आहे, जिथे त्यांच्यावर डॉक्टरांच्या देखरेखीखाली उपचार सुरू आहेत. प्रशासनाकडून मृतांच्या ओख पटवण्याचे आणि त्यांच्या कुटुंबीयांना संपर्क साधण्याचे काम सुरू आहे.
जय महाराष्ट्र न्यूजवर ताज्या बातम्या आणि ब्रेकिंग न्यूज वाचा. अधिक माहितीसाठी भारताच्या बातम्या ब्राउझ करा.