महिलादिनानिमित्त पंतप्रधान मोदींनी एलिना मिश्रा आणि शिल्पी सोनी यांच्याकडे सोपवली सोशल मीडिया अकाउंट हाताळण्याची जबाबदारी; कोण आहेत या महिला? जाणून घ्या

Who is Elina Mishra and Shilpi Soni: आज जगभरात महिला दिन साजरा केला जात आहे. आंतरराष्ट्रीय महिला दिनानिमित्त, पंतप्रधान मोदींनीही 'महिला शक्ती'ला आंतरराष्ट्रीय महिला दिनाच्या शुभेच्छा दिल्या. यावेळी, पंतप्रधान मोदींनी विविध योजना आणि कार्यक्रमांद्वारे महिला सक्षमीकरणासाठी त्यांच्या सरकारच्या वचनबद्धतेचा पुनरुच्चार केला. महिला दिनानिमित्त पंतप्रधान मोदींनी त्यांचे सोशल मीडिया अकाउंट हाताळण्याची जबाबदारी अणुशास्त्रज्ञ एलिना मिश्रा आणि अंतराळशास्त्रज्ञ शिल्पी सोनी यांना दिली आहे.

कोण आहेत एलिना मिश्रा आणि शिल्पी सोनी?

पंतप्रधान मोदींच्या एक्स-अकाउंटद्वारे, दोन्ही महिला शास्त्रज्ञांनी अंतराळ तंत्रज्ञान, अणु तंत्रज्ञान आणि महिला सक्षमीकरणचा संदेश दिला आहे. 'आम्ही अलिना मिश्रा (अणुशास्त्रज्ञ) आणि शिल्पी सोनी (अंतराळ शास्त्रज्ञ) आहोत. महिला दिनी पंतप्रधानांच्या सोशल मीडिया अकाउंटचे नेतृत्व करताना आम्हाला खूप आनंद होत आहे. आमचा संदेश - भारत हे विज्ञानासाठी सर्वात चैतन्यशील ठिकाण आहे आणि म्हणूनच आम्ही अधिकाधिक महिलांना येथे सहभागी होण्याचं आवाहन करतो, असे त्यांनी एका पोस्टमध्ये म्हटलं आहे. 

महिला प्रतिभेसाठी भारत योग्य व्यासपीठ - 

एलिना मिश्रा आणि शिल्पी सोनी यांनी पुढे म्हटलं आहे की, 'आम्ही दोघीही, अलिना आणि शिल्पी, आमच्या क्षेत्रातील विस्तृत संधींकडे पाहत आहोत. अणु तंत्रज्ञानासारखे क्षेत्र भारतातील महिलांसाठी इतक्या संधी देईल हे अकल्पनीय होते. त्याचप्रमाणे, अंतराळ जगात महिला आणि खाजगी क्षेत्राचा वाढता सहभाग भारताला नवोपक्रम आणि विकासासाठी सर्वात आकर्षक स्थान बनवतो! भारतीय महिलांमध्ये निश्चितच प्रतिभा आहे आणि भारताकडे निश्चितच योग्य व्यासपीठ आहे!'

हेही वाचा - सरकार महिलांसाठी कोणत्या योजना राबवते? काय आहेत या योजनांचे फायदे? जाणून घ्या

एलिना मिश्रा यांनी पंतप्रधानांच्या सोशल अकाउंटवरून काय पोस्ट केली? 

अणुशास्त्रज्ञ एलिना मिश्रा यांनी पंतप्रधान मोदींच्या सोशल मीडिया अकाउंट 'एक्स' वरून लिहिले की, 'मी एलिना मिश्रा आहे आणि मी ओडिशातील भुवनेश्वरची आहे. मी अशा कुटुंबातील आहे ज्यांची शैक्षणिक पार्श्वभूमी खूप चांगली आहे आणि म्हणूनच त्यांनी मला विज्ञान शिकण्यासाठी अनुकूल वातावरण निर्माण केले. माझे प्रेरणास्थान असलेल्या माझ्या वडिलांमुळे विज्ञानाबद्दलची माझी आवड आणि उत्सुकता वाढली, ज्यांना मी त्यांच्या संशोधनासाठी अथक परिश्रम करताना पाहिले आहे. मुंबईतील भाभा अणु संशोधन केंद्रात माझी निवड झाल्यावर विज्ञान क्षेत्रात काम करण्याचे माझे स्वप्न पूर्ण झाले.' 

एलिना मिश्रा यांनी पुढे लिहिले आहे की, 'दुर्गम आणि ग्रामीण भागात प्राथमिक आरोग्य सेवा निदान आणि इमेजिंग सुविधा कमी असल्याने, कमी किमतीच्या, कॉम्पॅक्ट, पोर्टेबल, क्रायो-मुक्त, हलक्या वजनाच्या प्रणालीसाठी एक नवीन उपाय शोधण्यात आला जो दुर्गम भागात सहजपणे वाहून नेला जाऊ शकतो. यासाठी, आम्ही वैद्यकीय अनुप्रयोगांसाठी इन-बिल्ट मॅग्नेटिक फील्ड ग्रेडियंटसह हॅल्बाक आधारित स्थायी चुंबक द्विध्रुवीय डिझाइन आणि विकसित केले आहे. यापैकी बरेच काही तांत्रिक वाटू शकते, परंतु ते निश्चितच समाधानकारक आहे आणि अणु तंत्रज्ञान जीवन कसे चांगले बनवू शकते हे देखील दर्शवते!'

हेही वाचा - MP Modi Inaugurates Namo Hospital In Silvassa: मोदींच्या हस्ते नमो रूग्णालयाच्या पहिल्या टप्प्याचे उद्घाटन

शिल्पी सोनीने यांनी काय पोस्ट केली?

अंतराळ शास्त्रज्ञ शिल्पी सोनी यांनी लिहिले आहे की, 'मी मध्य प्रदेशातील सागर येथील शिल्पी सोनी आहे. मी अगदी साध्या पार्श्वभूमीतून आले आहे, परंतु माझे कुटुंब नेहमीच शिक्षण, नवोपक्रम आणि संस्कृतीबद्दल उत्साही राहिले आहे. डीआरडीओमध्ये काम केल्यानंतर, इस्रोसोबत काम करण्याचे माझे स्वप्न पूर्ण झाले, जिथे मी गेल्या 24 वर्षांत इस्रोच्या 35 हून अधिक संप्रेषण आणि नेव्हिगेशन मोहिमांसाठी अत्याधुनिक आरएफ आणि मायक्रोवेव्ह सबसिस्टम तंत्रज्ञानाची रचना, विकास आणि प्रेरण करण्यात योगदान दिले आहे.' 

शिल्पी सोनी पुढे पोस्टमध्ये म्हटलं आहे की, 'माझी सध्याची जबाबदारी भारतातील नागरिकांच्या दळणवळण गरजा पूर्ण करण्यासाठी GSAT-22/23 कम्युनिकेशन पेलोड्ससाठी असोसिएट प्रोजेक्ट डायरेक्टर म्हणून काम करणे आहे. यापूर्वी, मला GSAT च्या प्रक्षेपणासाठी फ्रेंच गयाना येथील कौरो येथे ISRO च्या प्रतिनिधी मंडळाचा भाग होण्याचा मान मिळाला होता. हे अंतराळयान 14 नोव्हेंबर 2017 रोजी अवकाशात सोडण्यात आले.' अशा प्रकारे एलिना आणि सोनी यांनी आपला प्रवास पंतप्रधान मोदी यांच्या सोशल मीडिया अकाउंटवरून देशभरातील जनतेसमोर मांडला आहे. तसेच यानिमित्ताने त्यांनी महिलांना अंतराळ क्षेत्रातील संशोधनात भाग घेण्याचे आवाहन केले आहे.