नाशिक जिल्ह्यातील डोंगराळे येथील साडेचार वर्षांच्या चिमुकलीवरील लैंगिक अत्याचार आणि हत्या प्रकरणात न्यायालयाने महत्त्वपूर्ण निकाल दिला आहे. मालेगाव येथील अप्पर जिल्हा आणि सत्र न्यायालयाने आरोपी विजय खैरनार याला फाशीची शिक्षा सुनावल्याची माहिती समोर आली आहे. या प्रकरणात पीडित चिमुकलीच्या कुटुंबाला 10 लाख रुपयांची आर्थिक मदत देण्यात येणार असल्याचेही विशेष सरकारी वकील उज्ज्वल निकम यांनी सांगितले.
या घटनेने संपूर्ण महाराष्ट्र हादरला होता. चिमुकलीवर झालेल्या अत्याचारानंतर तिची हत्या करण्यात आल्याने नागरिकांमध्ये तीव्र संताप व्यक्त करण्यात आला होता. आरोपीला कठोरात कठोर शिक्षा देण्याची मागणी विविध स्तरांतून करण्यात येत होती. त्यामुळे या खटल्याच्या निकालाकडे राज्याचे लक्ष लागले होते.
काय आहे डोंगराळे प्रकरण?
मिळालेल्या माहितीनुसार, गेल्या वर्षी 16 नोव्हेंबर रोजी डोंगराळे गावातून साडेचार वर्षांच्या चिमुरडीचे अपहरण करण्यात आले होते. त्यानंतर तिच्यावर लैंगिक अत्याचार करून तिची हत्या करण्यात आल्याचा आरोप विजय खैरनार याच्यावर ठेवण्यात आला. या अमानुष घटनेमुळे परिसरात शोककळा पसरली होती, तर राज्यभरातून संताप व्यक्त करण्यात आला होता.
घटनेचे गांभीर्य लक्षात घेऊन पोलिसांनी तपासाला वेग दिला. तपासादरम्यान गावातीलच विजय खैरनार याला अटक करण्यात आली. पोलिसांनी अवघ्या काही तासांत आरोपीला ताब्यात घेतल्याची माहिती आहे. त्यानंतर या प्रकरणात तीन आठवड्यांच्या आत न्यायालयात दोषारोपपत्र दाखल करण्यात आले.
विशेष सरकारी वकिलांनी मांडली बाजू
या खटल्यात विशेष सरकारी वकील उज्ज्वल निकम यांनी शासनाच्या वतीने न्यायालयात बाजू मांडली. गेल्या सुमारे 10 महिन्यांपासून या प्रकरणाची सुनावणी सुरू होती. अखेर न्यायालयाने आरोपीला फाशीची शिक्षा सुनावल्याची माहिती समोर आली आहे.
पीडित कुटुंबाला 10 लाखांची मदत
न्यायालयाच्या निकालासोबतच पीडित चिमुकलीच्या कुटुंबाला 10 लाख रुपयांची आर्थिक मदत देण्यात येणार असल्याचे उज्ज्वल निकम यांनी सांगितले. या मदतीमुळे दुःखातून जात असलेल्या कुटुंबाला काही प्रमाणात आधार मिळू शकतो. या प्रकरणातील निकालामुळे बालकांच्या सुरक्षिततेचा आणि महिलांवरील अत्याचारांविरोधातील कठोर कारवाईचा मुद्दा पुन्हा चर्चेत आला आहे.
