श्रीरामपूर : 24 टन साखर घेऊन भिवंडी-उल्हासनगरकडे निघालेला ट्रक चालकाने मार्ग बदलून थेट गुजरात गाठल्याचा धक्कादायक प्रकार उघडकीस आला आहे. या प्रकरणी श्रीरामपूर पोलिसांनी तातडीने तपास करून आरोपी चालकाला गुजरातमधील व्यारा येथून अटक केली असून, त्याच्याकडून तब्बल 28 लाख 50 हजार रुपयांचा मुद्देमाल जप्त करण्यात आला आहे.
श्रीरामपूर येथील साखर कारखान्यातून सुमारे 24 टन साखर भिवंडी-उल्हासनगरला पोहोचवण्यासाठी ट्रक पाठवण्यात आला होता. मात्र काही तासांनंतर चालकाशी कोणताही संपर्क साधता आला नाही. साखर पोहोचली नसल्यामुळे संबंधित कंपनीने श्रीरामपूर पोलीस ठाण्यात तक्रार दाखल केली.
तक्रारीनंतर पोलिसांनी तपासाची चक्रे फिरवली. पोलिस निरीक्षक नितीन देशमुख यांच्या मार्गदर्शनाखाली एका विशेष पथकाची स्थापना करण्यात आली. पोलिसांनी ट्रकच्या लोकेशनचा मागोवा घेत गुजरात राज्यातील व्यारा भागात त्याचे ठसे मिळवले. तत्काळ कारवाई करत पथकाने व्यारा येथे धाव घेत ट्रकसह साखरेचे पोते आणि चालकास ताब्यात घेतले.
१६ वर्षीय विद्यार्थ्याचा विजेच्या धक्क्याने मृत्यू; दहावीचा निकाल पाहण्याआधीच काळाने गाठले
पोलिसांनी दिलेल्या माहितीनुसार, ट्रकमध्ये असलेल्या 24 टन साखरेची अंदाजे किंमत 26 लाख रुपये असून, ट्रकसह एकूण जप्त मुद्देमालाची किंमत 28 लाख 50 हजार रुपये इतकी आहे. आरोपीने हा माल स्वतःच्या फायद्यासाठी वळवण्याचा प्रयत्न केला होता, मात्र पोलिसांच्या सतर्कतेमुळे तो अयशस्वी ठरला.
सदर घटनेत गुन्हा दाखल करण्यात आला असून आरोपीविरुद्ध फसवणूक, विश्वासघात आणि मालमत्तेचा अपहार यासारख्या गंभीर कलमांखाली गुन्हा नोंदवण्यात आला आहे.
या घटनेमुळे वाहतूक व लॉजिस्टिक क्षेत्रात विश्वासार्हता राखण्याच्या दृष्टीने चालकांची पार्श्वभूमी तपासणे, GPS प्रणालीचा वापर अनिवार्य करणे, आणि मालवाहतुकीवर सतत लक्ष ठेवण्याची गरज अधोरेखित झाली आहे. श्रीरामपूर पोलिसांच्या या जलद आणि परिणामकारक कारवाईचे सर्वत्र कौतुक होत आहे.