Air India Plane Crash: गुजरातमधील अहमदाबाद येथील एअर इंडियाच्या विमानाच्या 12 जून रोजी मोठा अपघात झाला होता. या अपघातात केवळ एक प्रवासी सोडला तर इतर सर्वांचा मृत्यू झाला होता. तथापी, अद्याप या विमान अपघाताचे कारण पूर्णपणे स्पष्ट झालेले नाही. आतापर्यंतच्या तपासात असे दिसून आले आहे की अपघाताचे कारण दोन्ही इंजिनमधील बिघाड असू शकते. अहमदाबादमध्ये एअर इंडियाच्या विमान अपघात प्रकरणात एक नवीन अपडेट समोर आली आहे.
अहमदाबाद अपघातासंदर्भात मोठा खुलासा -
अपघाताचे कारण शोधण्यासाठी एअर इंडियाच्या वैमानिकांनी फ्लाइट सिम्युलेटरच्या चाचण्याही घेतल्या. या तपासात असे दिसून आले आहे की विमानाच्या दोन्ही इंजिनमध्ये बिघाड झाल्यामुळे विमान कोसळले असावे. तपासादरम्यान, एअरलाइनच्या वैमानिकांनी फ्लाइट सिम्युलेटरमध्ये विविध फ्लाइट पॅरामीटर्स पुन्हा तयार केले, ज्यामध्ये लँडिंग गियरची स्थिती आणि विंग फ्लॅप्स मागे घेणे यांचा समावेश होता. तपासात असे आढळून आले की केवळ या सेटिंग्जमुळे अपघात झाला नाही.
हेही वाचा - DGCA च्या चौकशीत मोठा खुलासा! प्रमुख विमानतळांवरील विमान वाहतूक व्यवस्थेत आढळल्या अनेक त्रुटी
अपघाताची संभाव्य कारणे शोधण्याचा प्रयत्न -
तथापी, तपासात असे आढळून आले आहे की विमान क्रॅश होण्याच्या काही सेकंद आधी आपत्कालीन पॉवर टर्बाइन देखील चालू करण्यात आली होती, ज्यामुळे असे सूचित होते की तांत्रिक बिघाडामुळे हा अपघात झाला. एअरक्राफ्ट अॅक्सिडेंट इन्व्हेस्टिगेशन ब्युरो (AAIB) च्या नेतृत्वाखाली अपघाताची अधिकृत चौकशी सुरू आहे. फ्लाइट सिम्युलेटरची चौकशी अधिकृत तपासापेक्षा वेगळी होती. या तपासात अपघाताची संभाव्य कारणे शोधण्याचा प्रयत्न करण्यात आला.
हेही वाचा - अहमदाबाद विमान अपघातातील 190 मृतदेहांची DNA ओळख पटली! आतापर्यंत 157 मृतदेह कुटुंबियांना सुपूर्द
फ्लाइट सिम्युलेटर म्हणजे काय?
फ्लाइट सिम्युलेटर हे एक उपकरण किंवा सॉफ्टवेअर आहे ज्यामध्ये विमानाच्या उड्डाणासारख्या परिस्थिती तयार केल्या जातात. फ्लाइट सिम्युलेटरचा वापर वैमानिकांना प्रशिक्षण देण्यासाठी, विमान डिझाइन आणि संशोधन इत्यादींमध्ये केला जातो. त्यात विमान नियंत्रण प्रणाली, उड्डाण गतिशीलता आणि विमान उडवण्याचा अनुभव यांचा समावेश असतो, जेणेकरून विमान सुरक्षितपणे उडवण्याचे प्रशिक्षण देता येईल.