देवेन भारती यांची मुंबईचे नवे पोलीस आयुक्त म्हणून नियुक्ती

मुंबई: फडणवीस सरकारने वरिष्ठ आयपीएस अधिकारी देवेन भारती यांची मुंबईचे नवे पोलीस आयुक्त म्हणून नियुक्ती केली आहे. 1994 च्या बॅचच्या आयपीएस अधिकारी देवेन भारती हे यापूर्वी मुंबईत विशेष पोलिस आयुक्त म्हणून कार्यरत होते. विद्यमान आयुक्त विवेक फणसाळकर यांच्या निवृत्तीनंतर हे पद रिक्त झाल्यानंतर त्यांना या पदाची जबाबदारी देण्यात आली. आगामी बृहन्मुंबई महानगरपालिका (BMC) निवडणुकीपूर्वी देवेन भारती यांची नियुक्ती महत्त्वाची मानली जात आहे. शहरातील कायदा आणि सुव्यवस्था आणि सुरक्षा सुनिश्चित करण्याची जबाबदारी आता देवेन भारती यांच्यावर असणार आहे. 

देवेन भारती मुंबईचे नवे पोलिस आयुक्त - 

देवेन भारती यांची कारकीर्द खूपच महत्त्वपूर्ण राहिली आहे. त्यांनी मुंबईत सहपोलीस आयुक्त (कायदा आणि सुव्यवस्था) म्हणून सर्वाधिक काळ काम केले आहे. त्यांची पहिली पोस्टिंग नक्षलग्रस्त गडचिरोली येथे अतिरिक्त पोलिस अधीक्षक म्हणून होती. त्यानंतर त्यांना गडचिरोली, अमरावती आणि अकोला सारख्या जिल्ह्यांमध्ये पोलिस अधीक्षक (एसपी) म्हणून नियुक्त करण्यात आले.

हेही वाचा - माजी आमदार रामदास आंबटकर यांचं दुःखद निधन

26/11 च्या मुंबई हल्ल्याच्या तपासात महत्त्वाची भूमिका - 

दरम्यान, 2008 मध्ये झालेल्या 26/11 च्या मुंबई दहशतवादी हल्ल्याच्या तपासात वरिष्ठ आयपीएस अधिकारी देवेन भारती यांनी महत्त्वाची आणि निर्णायक भूमिका बजावली होती. त्यावेळी ते मुंबई पोलिसांच्या गुन्हे शाखेत वरिष्ठ पदावर कार्यरत होते आणि हल्ल्यांचा तपास करणाऱ्या मुख्य पथकाचा भाग होते. देवेन भारतींमुळेच पाकिस्तानातून येणाऱ्या दहशतवाद्यांचे रहस्य उघड झाले.

हेही वाचा - अक्षय तृतीयेच्या मुहूर्तावर श्री विठ्ठल रुक्मिणी मंदिरात भाविकांसाठी आमरस भोजनाची व्यवस्था

गुप्तचर विभागात काम - 

देवेन भारती यांनी 1998 ते 2003 पर्यंत गुप्तचर विभागात काम केले. मुंबईत त्यांची पहिली पोस्टिंग डीसीपी स्पेशल ब्रांच (II) म्हणून झाली. नंतर त्यांना मुंबई क्राइम ब्रांचमध्ये डीसीपी (डिटेक्शन) ही महत्त्वाची जबाबदारी देण्यात आली, जी क्राइम ब्रांचमध्ये एक प्रतिष्ठित पद मानली जाते. याशिवाय, त्यांनी महाराष्ट्रातील संघटित गुन्हेगारी, दहशतवाद आणि कायदा आणि सुव्यवस्थेशी संबंधित प्रकरणे हाताळण्यासाठी विविध विभागांमध्ये महत्त्वाची भूमिका बजावली आहे.